30802035315646716
recent
آخر الأطباق

الصابلي الجزائري الشهي

الخط

طريقة تحظير الصابلي الجزائري الشهي

أولا : صلي على رسول الله صلى الله عليه و سلم و قل الحمد الله و سبحان الله

الحاجة اللي تخلي الصابلي هشيش هي أولا لازم تحترمي المقادير تاعو باسكو عجينة السابلي عندها مقادير مضبوطة حيث أنه دايما كمية المرغرين تكون نصف كمية الفرينة و كمية السكر هي نص كمية المرغرين يعني اذا درتي باكي مرغرين تاع 250 غ يعني تستعملي 500 غ فرينة و 125 غ سكر هاذي مقادير ستوندار ممكن تزيد و لا تنقصي شوية الفرينة علي حساب واش تاكلك لابات بصح هذا هو المبدا تاع الصابلي
ثاني حاجة هي البيض...في القاطو صفار البيض يهشش لعجينة و البياض ييبسها... هاذي معلومة لازم تحفضيها... علي هذا و اذا حبيتي يجيك هشيش بزاف استعملي صفار البيض باش اطمي لعجينة احسن ما تستعملي بيضة كومبلي يعني.. 250 غ مرغرين لازملها 2 حبات بيض... أنت في عوض أديري 2 حبات كومبلي... ديري 2 صفار و حبة كومبلي...
السر الثالث هو في المايزينة.... تقدري أطمي العجينة بالفرينة وحدها و تجي مليحة بصح كي تزيديلها شوية مايزينة تحي هشيشة بزاف... يعني اذا حبيتي الصابلي تاعك يجي يقرمش شوية ديري الفرينة وحدها و اذا حبيتيها تجي مرملة كيما الغريبية زيديلها مايزينة...هاذي مسالة ذوق انا مرات نديرو بالفرينة وحدها و مرات نزيدلها مايزينة يعني القوام أللي يتبدل برك
رابع سر هو ...كي تلمي العجينة ما تعجنيهاش لميها برك.و لازم تخليها طرية ...هذا ثاني مبدا في القاطو... عجينة تلميها طرية مي تطيب تجيك طرية و اذا لميتيها يابسة سي نرمال في الفور تيبس أكثر ...علي هاذي قلتلك في السابلي ديما كيلي الفرينة تكون دوبل كمية ليدام سيريها مليح و حطيها قدامك باش ما تفوتيش هاذ الكمية .
ثاني كي تحلي العجينة تاعك من الاحسن تحليها فوق ساشي باش ما أديريش الفرينة باسكو كيما قلتلك كمية ليدام في السابلي محسوبة لوكان تحليها بفرينة بزاف قادرة تنشفي لعجينة و تجيك يابسة و كي تلميها حطيها في الفريجيدار مدة بسيطة حوالي 15 د باش تشد روحها و تجيك ساهلة في الحلان باسكو فيها ليدام بزاف لو مان تحليها تم تم تتقطعلك.
بالنسبة للتحضير...كاين طريقتين....
كاين أللي يخلط المرغرين مقطعة مكعبات مع الفرينة و يبسسهم بيدو و لا بالروبو حتي تدخل المرغرين في الفرينة و تتحصلي علي خليط يشبه للرمل و نزيدولو السكر قلاص نخلطو مليح ثم نلموها بالبيض اما بيض كامل او نستعملو صفار بيض مع بيضة كاملة... هاذ الطريقة أستعملتها دليلة تونسي تاع قناة سميرة و أنا شخصيا جربتها... و نقولكم بلي القاطو يجي مبسس بزاف بصح الذوق تاعو ماشي حاجة ...
الطريقة ثانية و هي الأفضل بالتجربة .... تبداي بالمرغرين تكون طرية ماشي ذايبة تخلطيها مع السكر قلاص بالباتور حتي تولي كريمة من بعد تزيديلهم البيض و تخلطيهم مليح باش يجيك القاطو بنين في الآخر تلميها بفرينة و مايزينية و تخلي العجينة طرية تغلفيها و تخليها ترتاح شوية في الثلاجة هنا القاطو يجيك بنين أحسن لان السكر تاعنا دخلناه في البيض و السكر مليح...
بالنسبة لليدام في السابلي نستعملو مرغرين وحدو يكفي و يجيك القاطو يهبل و طبعا أللي تقدر أدير الزبدة في عوض المرغرين ولا تخلطها مع المرغرين يجيك.القاطو شهيي باسكو الزبدة بنينة و ريحتها زاكية علابيها سومتها غالية
و كاين ناس ضافو مكون جديد ألا و هو الزيت يعني يديرو كمية تاع مرغرين كاملة و يزيدو شوية زيت زيادة قيس فنجان صغير ...أنا نقولكم بلي مرغرين وحدو يعطيك سابلي هاايل مي ممكن أتبعي هاذ الناس و أضيفي شوية زيت ...ما يخفالكمش بلي الزيت يهشش الحاجة هاذي حاجة معروفة يعني زيادة الهشاشة ..
بالنسبة للخميرة من الاحسن أديري كمية قليلة قرصة برك باش القاطو يحافظ علي الشكل تاعو باش كي تلصقيهم تجي كل حبة قد ختها و تقدري ما أديريش الخميرة واشنو اذا ما درتيش الخميرة ديري في بالك بلي الحبة تاع القاطو ما راحش تتنفخ يعني السمك أللي قطعتيه بيها راح يبقي هو هو بعد ما أطيبيها .. يعني اذا فيها خميرة اكيد تحليها رقيقة اكثر باسكو حتتنفخ و اذا ما درتيش الخميرة خشنيها اكثر....
و طبعا كي أطيبوها ما تحمروهاش لازم تقعد بيضة باش تجي شابة

للتوصل دائما بجديد وصفاتنا المرجو التفاعل والمشاركة مع الاصدقاء ودعوتهم للإعجاب بالصفحة
بالصحة و الهناء

الصابلي-الجزائري-الشهي
الصابلي الجزائري الشهي

شاهد أيضا :

ليست هناك تعليقات
إرسال تعليق

إرسال تعليق

نموذج الاتصال
الاسمبريد إلكترونيرسالة